گورنر خیبر پختونخوا نے کابینہ سے منظور پولیس ایکٹ کو غیر آئینی قرار دیدیا

گورنر خیبرپختونخوا فیصل کریم کنڈی نے صوبائی کابینہ کی جانب سے منظور کیے گئے نئے پولیس ایکٹ کو مکمل طور پر غیر آئینی قرار دیتے ہوئے شدید تنقید کا نشانہ بنایا ہے۔ میڈیا سے گفتگو کرتے ہوئے انہوں نے واضح کیا کہ جب بھی یہ ترمیم شدہ ایکٹ ان کے پاس دستخط کے لیے آئے گا، وہ اسے ہرگز منظور نہیں کریں گے بلکہ اس پر آئینی و قانونی اعتراضات عائد کرکے واپس بھیج دیں گے۔ انہوں نے کہا کہ عہدہ چاہے گورنر کا ہو یا وزیراعلیٰ کا، کسی کو بھی آئین کے خلاف ورزی کرتے ہوئے غلط اقدام اٹھانے کی اجازت نہیں دی جا سکتی۔

فیصل کریم کنڈی کا کہنا تھا کہ خیبرپختونخوا کی پی ٹی آئی حکومت شدید بوکھلاہٹ کا شکار ہے اور وہ انسپکٹر جنرل (آئی جی) اور صوبائی پولیس فورس کو اپنے سیاسی تابع بنانا چاہتی ہے۔ انہوں نے یاد دلایا کہ پی ٹی آئی کا ماضی میں یہ بیانیہ رہا ہے کہ پولیس کو غیر سیاسی ہونا چاہیے، مگر اب وہی حکومت پولیس کو اپنا سیاسی غلام بنانے پر تلی ہوئی ہے۔ گورنر کے مطابق، اگر صوبے میں آئینی بحران اور امن و امان کی صورتِ حال اسی طرح خراب ہوتی رہی تو وفاقی حکومت اور صدرِ مملکت آئین کے تحت گورنر راج نافذ کرنے سمیت تمام آپشنز پر غور کر سکتے ہیں۔