یورپی یونین کا روس پر مزید سخت پابندیاں عائد کرنے پر زور

اقوام متحدہ کی جنرل اسمبلی (UNGA) کے اجلاس کے موقع پر نیٹو کے مشرقی رکن ممالک اور یورپی یونین کے وزرائے خارجہ نے خبردار کیا ہے کہ روس یورپ بھر میں سائبر حملوں، ڈرونز کی فضائی حدود میں دراندازی اور دیگر تخریب کارانہ ہائبرڈ کارروائیوں میں تیز رفتاری سے اضافہ کر رہا ہے۔ یورپی حکام کا کہنا ہے کہ ان اقدامات کا مقصد مغرب کی صلاحیتوں کو آزمانا، یورپ میں خوف و ہراس پھیلانا اور یوکرین کے لیے جاری امداد و حمایت کو کمزور کرنا ہے۔ تاہم، وزرائے خارجہ نے واضح کیا کہ روس فی الوقت اتنی صلاحیت نہیں رکھتا کہ وہ نیٹو ممالک پر کوئی براہِ راست ملٹری یا فوجی حملہ کر سکے۔

یورپی یونین کی چیف آف فارن پالیسی کایا کالاس (Kaja Kallas) نے صحافیوں سے گفتگو کرتے ہوئے کہا کہ یورپ میں تخریب کاری اور فضائی حدود کی خلاف ورزی کے واقعات تشویشناک حد تک بڑھ چکے ہیں اور ماسکو کا بنیادی مقصد یورپی ممالک کو بلیک میل اور خوفزدہ کر کے یوکرین کی حمایت سے پیچھے ہٹانا ہے۔ انہوں نے ماسکو کے شیڈو فلیٹ اور ملٹری انڈسٹریل کمپلیکس پر مزید سخت یورپی پابندیاں عائد کرنے پر زور دیا۔ اس موقع پر ہنگامی اجلاس میں پولینڈ، رومانیہ اور ایسٹونیا سمیت دیگر یورپی رہنماؤں نے روس پر مزید سفارتی و معاشی دباؤ بڑھانے کے لیے باہمی اتحاد قائم رکھنے کے عزم کا اعادہ کیا۔