شہباز شریف سے ملاقات میں پاکستان میں جاری اصلاحات پر تبادلہ خیال ہوا، ایم ڈی آئی ایم ایف

بین الاقوامی مالیاتی فنڈ (آئی ایم ایف) کی منیجنگ ڈائریکٹر کرسٹالینا جارجیوا نے نیویارک میں اقوام متحدہ کی جنرل اسمبلی (UNGA) کے اجلاس کے موقع پر وزیراعظم پاکستان شہباز شریف سے ہونے والی ملاقات کے احوال پر روشنی ڈالی ہے۔ سوشل میڈیا پلیٹ فارم ‘ایکس’ (سابقہ ٹوئٹر) پر جاری اپنے ایک بیان میں ایم ڈی آئی ایم ایف نے بتایا کہ اس ملاقات میں پاکستان میں جاری معاشی اصلاحات اور مستقبل کے اہداف پر تفصیلی تبادلہ خیال کیا گیا۔

کرسٹالینا جارجیوا نے اپنے بیان میں لکھا کہ پاکستان میں جاری معاشی اصلاحات پر مضبوط اور بلا تعطل عمل درآمد کے باعث ملک میں معاشی استحکام قائم ہوا ہے، سرمایہ کاروں کا اعتماد بحال ہوا ہے اور پاکستان کی دوبارہ عالمی مالیاتی مارکیٹ تک رسائی آسان ہوئی ہے۔ ایم ڈی آئی ایم ایف کا کہنا تھا کہ پاکستان اگر ان اصلاحات کے سلسلے کو پائیدار بنیادوں پر برقرار رکھتا ہے تو اس سے نہ صرف معاشی ترقی کی رفتار میں نمایاں اضافہ ہوگا بلکہ عوام کے معیارِ زندگی کو بہتر بنانے میں بھی کلیدی مدد ملے گی۔