یورپی پارلیمنٹ کے وفد کا لاہور میوزیم کا دورہ، تاریخی اہمیت، ثقافتی ورثے بارے بریفنگ

یورپی پارلیمنٹ کے ایک اعلیٰ سطحی وفد نے لاہور میوزیم کا دورہ کیا اور وہاں موجود برصغیر اور خطے کے تاریخی و ثقافتی ورثے میں گہری دلچسپی کا اظہار کیا۔ اس وفد میں جرمنی، بلغاریہ اور دیگر یورپی ممالک سے تعلق رکھنے والے اراکینِ پارلیمنٹ شامل تھے۔ میوزیم آمد پر ڈائریکٹر لاہور میوزیم تاثیر احمد نے وفد کا پرجوش استقبال کیا اور مہمانوں کو میوزیم کی تاریخی اہمیت، نایاب نوادرات اور خطے کی قدیم تہذیب و ثقافت سے متعلق تفصیلی بریفنگ دی۔

دورے کے دوران یورپی پارلیمنٹ کے اراکین نے میوزیم کی مختلف گیلریوں کا معائنہ کیا اور ہزاروں سال قدیم تاریخی و ثقافتی اشیاء، گندھارا آرٹ اور اسلامی ادوار کے نوادرات کا باریک بینی سے مشاہدہ کیا۔ یورپی وفد کے اراکین نے لاہور میوزیم میں نوادرات کی دیکھ بھال اور ثقافتی ورثے کی حفاظت کے معیار کو سراہا۔