’ٹوائے اسٹوری 5‘ ایک ارب ڈالر کمانے والی سال کی پہلی ہالی ووڈ فلم بن گئی

ڈزنی اور پکسر کی مقبول اینیمیٹڈ فلم ’ٹوائے اسٹوری 5‘ نے عالمی باکس آفس پر 1 ارب ڈالر کا سنگ میل عبور کر لیا ہے، جس کے بعد یہ 2026 کی اب تک سب سے زیادہ کمائی کرنے والی پہلی ہالی ووڈ فلم بن گئی ہے۔ سینما گھروں میں ریلیز کے تقریباً 1 ماہ بعد یہ کامیابی حاصل کرنے والی اس فلم نے اپنی فرنچائز کی تاریخ کا سب سے بڑا اوپننگ ویک اینڈ بھی اپنے نام کیا تھا۔ اینڈریو اسٹینٹن کی ہدایت کاری میں بننے والی اس فلم میں ٹام ہینکس (ووڈی) اور ٹم ایلن (بز لائٹ ایئر) نے صداکاری کی ہے، جبکہ کہانی میں کھلونوں کو ’لیلی پیڈ‘ نامی ٹیبلٹ اور جدید ٹیکنالوجی کے چیلنجز کا سامنا ہے۔ پکسر اسٹوڈیو کے لیے یہ کامیابی ایسے وقت میں سامنے آئی ہے جب وہ حال ہی میں ملازمتوں میں کمی کے مرحلے سے گزرا ہے۔