جاپانی حکومت جنوبی پنجاب میں بچوں کی صحت کیلئے 18.62 ملین ڈالر گرانٹ دے گی

اسلام آباد: حکومت پاکستان اور جاپان کے درمیان بچوں کی صحت کی سہولیات کے لیے گرانٹ معاہدے پر دستخط ہو گئے۔ جاپانی حکومت جنوبی پنجاب میں بچوں کی صحت کی دیکھ بھال کے لیے جاپانی انٹرنیشنل کوآپریشن ایجنسی (JICA) کے ذریعے 2.91 ارب جاپانی ین یعنی تقریباً 18.62 ملین ڈالر فراہم کرے گی۔

اس منصوبے کے تحت چلڈرن ہسپتال اور انسٹی ٹیوٹ آف چائلڈ ہیلتھ (ICH) ملتان کو طبی سہولیات کے حوالے سے اپگریڈ کیا جائے گا، جو ریجن کا سب سے بڑا چائلڈ تھرٹی کیئر اسپتال ہے۔ پاکستان کی جانب سے سیکرٹری اقتصادی امور محمد حمیر کریم اور جاپان کی جانب سے سفیر اکا ماتسو شوئچی نے معاہدے پر دستخط کیے۔

سیکرٹری اقتصادی امور نے جاپانی حکومت اور عوام کی معاونت کو سراہا اور کہا کہ منصوبے کے کامیاب نفاذ کو یقینی بنایا جائے گا۔ جاپانی سفیر نے کہا کہ پاکستان کے ساتھ دوستانہ تعلقات اور دوطرفہ تعاون مزید مضبوط بنایا جائے گا۔