افغانستان میں 2 کروڑ 90 لاکھ افراد بنیادی ضروریات سے محروم ہیں: دی ٹیلیگراف

برطانوی جریدے ‘دی ٹیلی گراف’ نے اپنی رپورٹ میں طالبان رجیم کے پانچ سالہ دورِ حکمرانی میں افغانستان کی ابتر زمینی صورتحال اور عوامی مشکلات کا جائزہ پیش کیا ہے۔ رپورٹ کے مطابق جہاں طالبان اقتدار کا جشن منا رہے ہیں، وہیں افغان عوام بھوک، بے روزگاری اور شدید غربت میں مبتلا ہیں۔ اب تک 34 لاکھ افغان شہری ملک چھوڑنے پر مجبور ہو چکے ہیں جبکہ روزگار کی تلاش میں ایران جانے والے متعدد افغان صحرائی راستوں میں گرمی اور پیاس سے جان کی بازی ہار رہے ہیں۔ اقوام متحدہ کے مطابق اس وقت تقریباً 2 کروڑ 20 لاکھ افراد انسانی امداد کے منتظر ہیں اور 2 کروڑ 90 لاکھ افغان بنیادی ضروریات سے محروم ہیں۔ مزید برآں، خواتین اور لڑکیوں پر تعلیم و روزگار کی سخت پابندیاں عائد ہیں، جس کے باعث یونیسکو کے مطابق 24 لاکھ لڑکیاں تعلیم کے حق سے محروم ہو چکی ہیں۔