افغانستان بے بنیاد الزامات کے بجائے دہشتگردوں کے ٹھکانے ختم کرے: طارق فضل چودھری

وفاقی وزیر برائے پارلیمانی امور ڈاکٹر طارق فضل چودھری نے افغان حکام کی جانب سے پاکستان کے خلاف کی جانے والی تمام تر الزام تراشیوں کو سختی سے مسترد کرتے ہوئے کہا ہے کہ افغان عبوری حکومت بے بنیاد الزامات لگانے کے بجائے اپنی سرزمین پر موجود دہشت گردوں کے ٹھکانے ختم کرے۔

وفاقی دارالحکومت میں میڈیا سے گفتگو کرتے ہوئے طارق فضل چودھری نے کہا کہ پاکستان پر لگائے جانے والے افغان الزامات کی کوئی حقیقت نہیں، لہٰذا افغان حکام اپنی سرزمین سے پاکستان میں ہونے والی دراندازی کا مکمل اور فوری خاتمہ یقینی بنائیں۔ انہوں نے کہا کہ پاکستان نے دوحہ اور استنبول مذاکرات کے دوران بھی افغان نمائندوں کے سامنے افغانستان سے ہونے والی دہشت گردی کے ٹھوس اور ناقابلِ تردید شواہد رکھے تھے، مگر اس کے باوجود افغان عبوری حکومت دراندازی روکنے کے لیے تیار نظر نہیں آئی۔

وفاقی وزیر نے واضح کیا کہ پاکستان نے ہمیشہ خطے میں امن و استحکام کی بات کی ہے، تاہم اگر ہماری سلامتی پر جارحیت مسلط کی گئی تو اس کا منہ توڑ جواب دیا جائے گا۔ انہوں نے خبردار کیا کہ اگر افغان سرزمین پاکستان کے خلاف دہشت گردی کے لیے استعمال ہوتی رہی تو پاکستان کو اپنے دفاع اور عوام کی تحفظ کے لیے تمام ضروری اقدامات کرنے کا پورا حق حاصل ہے۔