مفتی منیب الرحمان دوبارہ 5 سال کے لیے تنظیم المدارس کے صدر منتخب ہوگئے

لاہور میں تنظیم المدارس اہلِ سنت کی مرکزی مجلسِ شوریٰ کے اجلاس میں مفتی منیب الرحمان کو آئندہ پانچ سال کے لیے تنظیم المدارس کا مرکزی صدر منتخب کرلیا گیا۔ انتخاب مکمل اتفاقِ رائے سے ہوا، جس پر شوریٰ ارکان نے بھرپور اعتماد اور اطمینان کا اظہار کیا۔

اجلاس میں دیگر عہدیداران کا انتخاب بھی متفقہ طور پر عمل میں آیا۔ علامہ عبدالمصطفیٰ ہزاروی کو مرکزی ناظمِ اعلیٰ مقرر کیا گیا، جبکہ ارشد سعید کاظمی اور محمد عثمان قادری کو نائب ناظم کی ذمہ داریاں سونپی گئیں۔

شوریٰ نے توقع ظاہر کی کہ نئی قیادت مدارس کے تعلیمی نظام، انتظامی اصلاحات اور جدید تقاضوں کے مطابق بہتری کے ایجنڈے کو مزید مؤثر انداز میں آگے بڑھائے گی۔

مزید برآں، شوریٰ نے تنظیم المدارس کے چیئرمین امتحانی بورڈ علامہ حافظ عبدالستار سعیدی پر مکمل اعتماد کا اظہار کرتے ہوئے انہیں آئندہ مدت کے لیے بھی ذمہ داری جاری رکھنے کا اختیار دے دیا۔ اجلاس میں امتحانی نظام میں شفافیت، جدید طریقہ کار اور انتظامی بہتری کو مزید مضبوط بنانے کے عزم کا اعادہ کیا گیا۔

شرکائے اجلاس نے اس بات پر بھی زور دیا کہ تنظیم المدارس دینی تعلیمی نظام کے فروغ اور ملی یکجہتی کے لیے اپنی خدمات پہلے کی طرح جاری رکھے گی۔