عراق کی سمندری حدود میں 2 غیر ملکی آئل ٹینکرز پر حملہ، عملے کا ایک رکن ہلاک

عراق کے قریب سمندری حدود میں تیل بردار دو غیر ملکی جہازوں پر حملہ کیا گیا جس کے نتیجے میں عملے کا ایک رکن ہلاک ہو گیا جبکہ دیگر افراد کو محفوظ نکال لیا گیا۔

عراقی حکام کے مطابق بارود سے لدی کشتیوں نے دونوں جہازوں کو نشانہ بنایا جس سے جہازوں میں آگ لگ گئی۔

حکام کا کہنا ہے کہ دونوں جہازوں پر سوار چوبیس افراد پر مشتمل عملے کو بحفاظت بچا لیا گیا جبکہ ایک غیر ملکی ملاح ہلاک ہوا۔

اسی دوران عمان کے شہر سلالہ میں واقع تیل کے ذخیرے میں آگ لگنے کی اطلاع بھی سامنے آئی ہے۔

ایران نے اس واقعے میں ملوث ہونے کی تردید کرتے ہوئے کہا ہے کہ عمان میں تیل کی تنصیب پر حملہ علاقائی تناؤ بڑھانے کی سازش ہو سکتا ہے۔

یاد رہے کہ حالیہ دنوں میں آبنائے ہرمز اور خلیجِ عمان میں کئی جہازوں کو نشانہ بنایا گیا ہے جن میں تھائی لینڈ، جاپان اور مارشل آئی لینڈ کے پرچم بردار جہاز شامل ہیں۔

پاسدارانِ انقلاب نے تھائی پرچم بردار جہاز پر حملے کی ذمہ داری قبول کی تھی۔