ٹی ٹوئنٹی ورلڈکپ میں شرکت کافیصلہ جمعے یاپیرتک ہوگا، چیئرمین پی سی بی

بھارت اور سری لنکامیں ہونے والے ٹی ٹوئنٹی ورلڈ کپ کرکٹ ٹورنامنٹ میں پاکستان کی شرکت کے معاملے پر چیئرمین پی سی بی کی وزیراعظم سے اہم ملاقات ہوئی۔

ملاقات میں محسن نقوی نے وزیراعظم کو آئی سی سی کی صورتحال سے آگاہ کیا جبکہ وزیر اعظم نے محسن نقوی کو معاملہ حل کرنے کی ہدایت کی۔

محسن نقوی نے ملاقات کے بعد سوشل میڈیاپربیان میں کہاکہ ٹی ٹوئنٹی ورلڈ کپ میں شمولیت کا فیصلہ جمعے یا پیر تک ہوگا۔محسن نقوی نے کہا کہ  وزیر اعظم کو ملاقات میں آئی سی سی معاملات پر بریفنگ دی ہے۔وزیر اعظم نے تمام آپشنز کو مدنظر رکھ کر معاملہ سلجھانے کی ہدایت دی۔

ذرائع کے مطابق محسن نقوی اور شہباز شریف کی  ملاقات میں محسن نقوی نے آئی سی سی کے دہرے معیار کے بارے میں بریفنگ دی، ان کاکہناتھاکہ آئی سی سی بھارت کے لیے ایک قانون اور دیگر ممالک کے لیے دوسرا قانون استعمال کرتاہے۔

ذرائع کے مطابق محسن نقوی نےکہا کہ بھارت چیمپئنز ٹرافی میں پاکستان آنے سے انکارکرچکا تھا جس پر اسے دوسرا وینیو دیاگیا۔ٹی ٹوئنٹی ورلڈکپ کے حوالے سے بنگلادیش نے آئی سی سی کوبھارت میں سیکیورٹی خدشات سےآگاہ کردیا تھا لیکن بنگلا دیش کو متبادل وینیو دینے کی بجائے ورلڈ کپ سے آؤٹ کردیاگیا۔

ذرائع کے مطابق محسن نقوی نے کہا اگرپاکستان ورلڈ کپ میں شرکت نہیں کرے گا توپاکستان کو شمولیت کےعوض خطیر رقم نہیں ملے گی۔تاہم اگر بھارت کے ساتھ میچ نہ کھیلیں تو اس کا زیادہ نقصان بھارت کو ہوگا۔