اسرائیل کے ساتھ لڑائی سے گریز، سکیورٹی معاہدے پر کام کر رہے ہیں: شامی صدر

شامی صدر احمد الشرع نے انکشاف کیا ہے کہ دمشق اسرائیل کے ساتھ ایک سیکیورٹی معاہدے تک پہنچنے کے لیے عالمی تعاون سے سرگرم عمل ہے، تاکہ خطے میں جامع اور پائیدار امن قائم ہو سکے۔ قطری نشریاتی ادارے کو دیے گئے انٹرویو میں انہوں نے واضح کیا کہ ایسا کوئی بھی سیکیورٹی انتظام گولان کی مقبوضہ پہاڑیوں پر شام کے تاریخی حق سے دستبرداری کا سبب نہیں بنے گا۔ انہوں نے لبنان کے معاملے پر بات کرتے ہوئے کہا کہ شام کا لبنان میں فوجی مداخلت کا کوئی ارادہ نہیں ہے اور جنگ و امن کا اختیار صرف لبنانی ریاست کے پاس ہونا چاہیے۔ صدر الشرع نے امریکا پر زور دیا کہ شام کی معیشت کی بحالی کے لیے اقتصادی پابندیوں کے خاتمے کے ساتھ ساتھ اسے دہشت گردی کی سرپرستی کرنے والے ممالک کی فہرست سے بھی نکالا جائے۔ اس کے علاوہ، انہوں نے خانہ جنگی کے دوران لاپتہ ہونے والے لاکھوں افراد کے مسئلے کے حل کے لیے ایک بین الاقوامی معیار کی خصوصی کمیٹی قائم کرنے کا بھی اعلان کیا۔