فٹ بال ورلڈ کپ: قطر اور سوئٹزر لینڈ کا میچ ایک، ایک گول سے برابر

فٹ بال ورلڈ کپ کے تیسرے روز کھیلے گئے پہلے مقابلے میں سوئٹزرلینڈ اور قطر کی ٹیموں کے درمیان دلچسپ میچ ایک، ایک گول سے برابر ہوگیا۔

سان فرانسسکو میں ہونے والے اس مقابلے میں سوئٹزرلینڈ کی ٹیم نے آغاز ہی سے کھیل پر گرفت مضبوط رکھی اور حریف ٹیم کے گول پر متعدد خطرناک حملے کیے۔

میچ کے پہلے ہاف کے سترہویں منٹ میں ملنے والی پنالٹی کک پر بریل ایمبولو نے گیند جال میں پہنچا کر اپنی ٹیم کو ایک، صفر کی برتری دلائی۔

پہلے ہاف کے اختتام تک سوئٹزرلینڈ کو یہی برتری حاصل رہی، تاہم دوسرے ہاف میں قطر کی ٹیم نے بھرپور مزاحمت کرتے ہوئے واپسی کی کوششیں جاری رکھیں۔

میچ کے آخری لمحات میں قطر کے بوالم کھوکھی نے شاندار ہیڈر کے ذریعے گیند حریف ٹیم کے جال میں پہنچا کر مقابلہ ایک، ایک گول سے برابر کردیا۔

مقررہ وقت کے اختتام تک دونوں ٹیمیں مزید گول کرنے میں کامیاب نہ ہوسکیں اور مقابلہ برابر رہا۔

میچ کے ڈرا ہونے کے نتیجے میں قطر کی ٹیم پہلی مرتبہ فٹ بال ورلڈ کپ میں ایک پوائنٹ حاصل کرنے میں کامیاب ہوگئی۔