سوات ایکسپریس وے پر وین کی بس کو ٹکر، 11 افراد جاں بحق، 7 زخمی

سوات ایکسپریس وے پر مسافر وین اور بس کے مابین ہونے والے ایک ہولناک اور المناک سڑک حادثے کے نتیجے میں کم از کم 11 مسافر جاں بحق جبکہ 7 افراد شدید زخمی ہو گئے ہیں۔ موٹر وے پولیس کی جانب سے جاری کردہ ابتدائی معلومات کے مطابق، یہ افسوسناک حادثہ مسافر وین کے ڈرائیور کی مبینہ غفلت، تیز رفتاری اور شدید لاپرواہی کے باعث پیش آیا۔

پولیس حکام نے واقعے کی تفصیلات بتاتے ہوئےکہا کہ ایک انتہائی تیز رفتار مسافر وین نے سڑک کے کنارے پہلے سے کھڑی ایک مسافر بس کو پیچھے سے زوردار ٹکر ماری، جس کے نتیجے میں دونوں گاڑیاں بری طرح تباہ ہو گئیں۔حادثے کا شکار ہونے والی مسافر بس کراچی سے بونیر جا رہی تھی، جبکہ پیچھے سے ہٹ کرنے والی تیز رفتار وین راولپنڈی سے دیر کی طرف گامزن تھی۔

خونریز حادثے کی اطلاع ملتے ہی موٹر وے پولیس کی ریسکیو ٹیمیں اور ضلعی انتظامیہ فوری طور پر جائے وقوعہ پر پہنچ گئیں۔ امدادی کارکنوں نے گاڑیوں کے حصے کاٹ کر لاشوں اور زخمیوں کو باہر نکالا۔ موٹر وے پولیس کے مطابقتمام جاں بحق ہونے والے افراد کی نعشوں اور شدید زخمی مسافروں کو فوری طور پر مردان میڈیکل کمپلیکس (MMC) منتقل کر دیا گیا ہے، جہاں ہسپتال انتظامیہ کی جانب سے ہنگامی حالت (ایمرجنسی) نافذ کر کے زخمیوں کو بچانے کے لیے فوری طبی امداد فراہم کی جا رہی ہے۔ انتظامیہ کے مطابق بعض زخمیوں کی حالت تشویشناک ہے جس کے باعث ہلاکتوں میں مزید اضافے کا خدشہ ہے۔

سماجی و عوامی حلقوں نے ایکسپریس ویز پر گاڑیوں کی تیز رفتاری کی نگرانی کے نظام کو مزید سخت کرنے کا مطالبہ کیا ہے تاکہ تیز رفتاری اور نیند کے غلبے کے باعث پیش آنے والے ایسے قیمتی جانوں کے ضیاع کو روکا جا سکے۔