دہائیوں بعد کباڑ سے نکلنے والی سپرمین نمبر 1 کی کتاب اربوں روپے میں فروخت

عرصے تک کباڑ میں چھپی رہنے والی سپرمین نمبر 1 کی ایک کاپی دنیا کی مہنگی ترین کامک بک بن گئی ہے۔ اس نایاب کامک بک کو 91 لاکھ 20 ہزار ڈالرز (ڈھائی ارب پاکستانی روپے سے زائد) میں نیلام کیا گیا۔

یہ کامک بک 1939 میں شائع ہوئی تھی اور سپرمین کے پہلے سولو ایڈونچر پر مبنی تھی، جو کہ اس کردار پر مبنی پہلی مکمل کتاب تھی۔ دہائیوں تک یہ کتاب ایک گھر کی دوچھتی میں موجود پرانے سامان میں دبی رہی۔

شمالی کیلیفورنیا کے تین بھائیوں نے 2024 میں اسے ایک ڈبے میں پرانے اخبارات کے درمیان دریافت کیا۔ ان کی ماں نے اس کامک بک کو اس وقت خریدا تھا جب ان کی عمر محض 9 سال تھی اور وہ سان فرانسسکو میں مقیم تھیں۔ بھائیوں کے مطابق برسوں تک ان کی ماں بتاتی رہیں کہ ان کے پاس نایاب کامک موجود ہے، مگر وہ اسے تلاش نہیں کر سکے۔

یہ 86 سال پرانی کامک بک اب بھی بہترین حالت میں ہے۔ اس سے قبل سب سے مہنگی کامک بک ایکش کامکس نمبر 1 تھی، جو 2024 میں 60 لاکھ ڈالرز میں فروخت ہوئی تھی۔

سپرمین نمبر 1 کی ابتدا میں 5 لاکھ کاپیز شائع کی گئیں، جبکہ بعد میں 2 لاکھ اور پھر ڈیڑھ لاکھ کاپیز شائع ہوئیں۔ مگر اب بالکل درست حالت میں موجود کاپیز انتہائی نایاب ہیں، کیونکہ شائع ہونے کے وقت بچوں کو دعوت دی گئی تھی کہ وہ سرورق کو کاٹ کر پوسٹر کے طور پر استعمال کریں۔

اس کامک بک کو ہیریٹیج آکشنز نے نیلام کیا، اور اس کے نائب صدر Lon Allen نے کہا:
“یہ کامک بک پوپ کلچر میں ایک سنگ میل کی حیثیت رکھتی ہے، اور نیلام ہونے والی کاپی نہ صرف بہترین حالت میں تھی بلکہ اس کے پیچھے چھپی کہانی بھی فلم بنانے کے قابل ہے۔”

خیال رہے کہ سپرمین کا کردار کلیولینڈ کے دو نوجوانوں جیری سیگل اور جوئی سوشتر نے 1933 میں تخلیق کیا تھا، اور اس کے حقوق بعد میں صرف 130 ڈالرز میں ڈی سی کامکس کو فروخت کر دیے گئے تھے۔