سن سپاٹس غائب، دسمبر 2021 کے بعد پہلی بار سورج مکمل طور پر صاف

ماہرینِ فلکیات نے انکشاف کیا ہے کہ دسمبر 2021ء کے بعد پہلی مرتبہ سورج کی سطح مکمل طور پر صاف دکھائی دے رہی ہے اور اس پر کوئی ایک بھی ‘سن سپاٹ’ (سیاہ دھبہ) موجود نہیں۔

رشین اکیڈمی آف سائنس کے سپیس ریسرچ انسٹی ٹیوٹ کی رپورٹ کے مطابق، سورج کی موجودہ کیفیت غیر معمولی طور پر پرسکون ہے اور زمین کی جانب رخ کیے ہوئے اس کا حصہ ایک ہموار اور چمکدار ڈسک کی مانند نظر آ رہا ہے۔ رپورٹ میں بتایا گیا ہے کہ سورج کی سرگرمی جانچنے والا ‘فلیر ایکٹیویٹی انڈیکس’ بھی صفر کی سطح پر پہنچ گیا ہے، جو کہ 2024ء کے بعد پہلی بار ریکارڈ کیا گیا ہے۔

سائنسی اہمیت: سائنسدانوں کا کہنا ہے کہ سن سپاٹس دراصل طاقتور مقناطیسی میدان کے مراکز ہوتے ہیں جہاں سے توانائی کا اخراج اور سولر فلیرز پیدا ہوتے ہیں۔ ان دھبوں کا غائب ہونا اس بات کی علامت ہے کہ سورج ممکنہ طور پر ‘سولر منیمم’ (کم ترین شمسی سرگرمی) کے مرحلے میں داخل ہو رہا ہے۔ یہ صورتحال اس لیے بھی حیران کن ہے کیونکہ جنوری اور فروری 2026ء کے آغاز میں ہی سورج نے شدید ریڈی ایشن سٹورم اور طاقتور فلیرز کے ریکارڈ بنائے تھے، مگر اب اچانک یہ مکمل خاموشی عارضی بھی ہو سکتی ہے۔