آبنائے ہرمز میں بارودی سرنگوں سے ٹکرانے کے بعد سپر ٹینکر میں آگ بھڑک اٹھی

تہران/واشنگٹن: آبنائے ہرمز کے جنوبی حصے میں 2 بحری بارودی سرنگوں (Naval Mines) سے ٹکرانے کے بعد ایک سپر ٹینکر میں شدید آگ بھڑک اٹھی، جس کے بعد ٹینکر کی پیش قدمی مکمل طور پر رک گئی۔

ایرانی سرکاری ٹی وی کی رپورٹ کے مطابق مذکورہ ٹینکر آبی گزرگاہ سے غیر قانونی طور پر گزرنے کی کوشش کر رہا تھا۔ اگرچہ جہاز کی ملکیت اور عملے سے متعلق تفصیلی معلومات جاری نہیں کی گئیں، تاہم ایرانی پاسدارانِ انقلاب (IRGC) نے جاری کردہ بیان میں متنبہ کیا ہے کہ سکیورٹی قواعد اور مقررہ ضوابط کی خلاف ورزی کرنے والے دیگر بحری جہازوں کو بھی ایسے ہی انجام کا سامنا کرنا پڑے گا۔

دوسری جانب، امریکی سینٹرل کمانڈ (CENTCOM) نے صورتحال پر ردِعمل دیتے ہوئے بتایا ہے کہ امریکی افواج نے آبنائے ہرمز میں جہاز رانی کے لیے فوری خطرہ بننے والی پاسدارانِ انقلاب کی مائن لیئنگ فورسز کے خلاف محدود اور انتہائی درست (Precision) کارروائی کی ہے۔ سینٹ کام کے مطابق لارک جزیرے (Lark Island) پر موجود ایرانی پاسدارانِ انقلاب کی بارودی سرنگیں بچھانے والی فورسز عالمی آبی گزرگاہ کے لیے براہِ راست اور فوری خطرہ بن چکی تھیں، جس کے سدِ باب کے لیے یہ قدم اٹھایا گیا۔