جنگ سے خطے میں نئی جغرافیائی سیاسی بیداری پیدا ہوئی: ترجمان ایرانی فوج

ترجمان ایرانی فوج بریگیڈیئر جنرل محمد اکرم نیا نے کہا ہے کہ حالیہ جنگ کے نتیجے میں خطے میں نئی جغرافیائی سیاسی بیداری پیدا ہوئی ہے، جس سے آبنائے ہرمز کی سٹریٹجک اہمیت اور اس پر ایران کا اثر و رسوخ مزید واضح ہو گیا ہے۔ اپنے ایک بیان میں ان کا کہنا تھا کہ ایرانی فوج کی فعال حکمتِ عملی کا مقصد جنگ کی شروعات نہیں بلکہ کسی بھی بیرونی جارحیت کا بھرپور اور مؤثر جواب دینا ہے۔ انہوں نے بتایا کہ جنگ بندی کے دورانیے میں بھی نئے ہتھیاروں کی تیاری اور عسکری تربیت کا عمل مسلسل جاری ہے، جبکہ امریکہ کی معاندانہ پالیسیوں نے ایرانی قوم میں اتحاد کو مزید مضبوط کیا ہے۔ ان کا مزید کہنا تھا کہ معاشی چیلنجز کے باوجود حکومت اور مسلح افواج کے درمیان تعاون پہلے سے زیادہ مستحکم ہوا ہے۔