آبنائے ہرمز میں جہازوں کے تحفظ کے لیے فرانس کا بحری مشن، جنگی بیڑا تعینات کرنے کا اعلان

پیرس: ایران کی جانب سے آبنائے ہرمز کی بندش اور آئل ٹینکروں پر حملوں کے بعد فرانس نے تجارتی جہازوں کے تحفظ کے لیے بحری سیکیورٹی مشن شروع کرنے کا اعلان کیا ہے۔

فرانسیسی صدر ایمانوئیل میکرون نے قبرص کے دورے کے دوران میڈیا سے گفتگو میں کہا کہ یورپی اور اتحادی ممالک کے تعاون سے ایک دفاعی نوعیت کا مشن تیار کیا جا رہا ہے جس کا مقصد عالمی تجارتی جہازوں کو محفوظ راستہ فراہم کرنا ہے۔

صدر میکرون کے مطابق اس منصوبے کے تحت 8 جنگی جہاز، 2 ہیلی کاپٹر بردار جہاز اور طیارہ بردار بحری بیڑا بحیرہ روم، بحیرہ احمر اور آبنائے ہرمز کے اہم سمندری راستوں پر تعینات کیا جائے گا تاکہ تیل بردار اور کنٹینر جہازوں کو تحفظ فراہم کیا جا سکے۔

انہوں نے مزید کہا کہ یہ اقدام خطے میں جنگی صورتحال کے باعث پیدا ہونے والے خطرات کے پیش نظر کیا جا رہا ہے۔

فرانسیسی صدر نے قبرص پر گزشتہ ہفتے ہونے والے ڈرون حملے کا حوالہ دیتے ہوئے کہا کہ اگر قبرص پر دوبارہ حملہ ہوا تو اسے پورے یورپ کے خلاف حملہ تصور کیا جائے گا۔

یاد رہے کہ آبنائے ہرمز عالمی تجارت اور توانائی کی ترسیل کا ایک نہایت اہم بحری راستہ ہے جہاں سے دنیا بھر کے لیے تیل اور گیس لے جانے والے ٹینکرز گزرتے ہیں۔