کراچی: اسٹیٹ بینک کا بینکوں کے لیے کم از کم سرمایہ 20 ارب روپے مقرر کرنے کا فیصلہ، 2030 تک مہلت

کراچی میں اسٹیٹ بینک آف پاکستان نے بینکنگ کے شعبے کو مزید مستحکم بنانے کے لیے ایک اہم فیصلہ کرتے ہوئے ملک میں کام کرنے والے تمام مقامی کمرشل بینکوں کے لیے کم از کم سرمایہ (Minimum Capital Requirement) بڑھا کر 20 ارب روپے مقرر کر دیا ہے۔

مرکیزی بینک کی جانب سے جاری کردہ نئے سرکلر کے مطابق، اسٹیٹ بینک نے ترقیاتی مالیاتی اداروں (DFIs) کے لیے بھی کم از کم سرمایہ 10 ارب روپے مقرر کر دیا ہے۔ اس کے علاوہ غیر ملکی بینکوں کے سرمائے کے حوالے سے نئی حدیں مقرر کی گئی ہیں، جن کے تحت 5 تک برانچیں رکھنے والے غیر ملکی بینکوں کو 5 ارب روپے جبکہ 6 سے 50 برانچوں تک کے حامل غیر ملکی بینکوں کے لیے 10 ارب روپے کا سرمایہ رکھنا لازم ہوگا۔ اسٹیٹ بینک نے واضح کیا ہے کہ تمام بینکوں اور ترقیاتی مالیاتی اداروں کو ان نئے قواعد پر مکمل عملدرآمد کے لیے 31 دسمبر 2030 تک کی طویل مہلت فراہم کی گئی ہے۔