دہشتگردی سیاسی مسئلہ نہیں، جرم ہے، سرمایہ کار ہمارے ہیرو ہیں: ملک احمد خان

سپیکر پنجاب اسمبلی ملک احمد خان نے دوٹوک مؤقف اختیار کرتے ہوئے کہا ہے کہ دہشتگردی اور بدامنی کے ماحول میں دنیا کے کسی بھی ملک میں سرمایہ کاری اور معاشی سرگرمیوں کا فروغ ہرگز ممکن نہیں، تاہم پاکستان میں تمام تر غیر یقینی حالات کے باوجود سرمائے کا انخلا کرنے کے بجائے یہاں سرمایہ کاری جاری رکھنے والے مقامی اور غیر ملکی سرمایہ کار ہمارے اصل ہیرو ہیں۔ انہوں نے واضح کیا کہ دہشتگردی کوئی سیاسی مسئلہ نہیں بلکہ ایک سنگین جرم ہے، جس کے مکمل خاتمے کے لیے ریاست کو مؤثر اور آہنی اقدامات اٹھانا ہوں گے۔

لاہور میں میڈیا سے گفتگو کرتے ہوئے ملک احمد خان کا کہنا تھا کہ پاکستان میں مشکل حالات کے باوجود کاروبار اور صنعتوں میں سرمایہ کاری کرنے والے کاروباری افراد اور تجارتی برادری بھرپور خراجِ تحسین کی مستحق ہے۔ انہوں نے کہا کہ دہشتگردی کا ایک چھوٹا سا واقعہ بھی پورے ملک کی معیشت، سٹاک مارکیٹ اور مجموعی کاروباری ماحول کو شدید متاثر کر سکتا ہے، اس کے باوجود بڑے پیمانے پر سرمایہ کاری جاری رکھنا ایک انتہائی قابلِ قدر اقدام ہے۔

سپیکر پنجاب اسمبلی نے دہشتگردی کے ناسور کے خلاف حکومت، عسکری قیادت اور مسلح افواج کے غیر متزلزل عزم کو سراہتے ہوئے کہا کہ ریاست کے خلاف بندوق اٹھانے اور دہشتگردی کی راہ اپنانے والے عناصر کے ساتھ کوئی سیاسی حل تلاش نہیں کیا جا سکتا، بلکہ ایسے عناصر کا بھرپور مقابلہ کر کے ان کا مکمل خاتمہ کرنا ناگزیر ہے۔

ماضی کی غلط پالیسیوں پر کھل کر تنقید کرتے ہوئے ملک احمد خان کا کہنا تھا کہ ماضی میں افغان جہاد، سٹریٹجک ڈیپتھ کے نظریات اور لاکھوں افغان مہاجرین کو پاکستان میں بلامقصد آباد کرنے جیسے فیصلوں کے تباہ کن اثرات آج قوم کے سامنے آ رہے ہیں، اور ان غلط پالیسیوں کے نتائج کا خمیازہ ملک اور ہماری آنے والی نسلیں کئی دہائیوں سے بھگت رہی ہیں۔ انہوں نے زور دیا کہ دہشتگردی کے خلاف قائم موجودہ قومی عزم کو ہر صورت برقرار رکھا جانا چاہیے کیونکہ اس عفریت نے طویل عرصے سے پاکستانی عوام کو خوف اور غیر یقینی کے ماحول میں زندگی گزارنے پر مجبور کر رکھا ہے۔

علاوہ ازیں، ملک میں نئے صوبوں کے قیام سے متعلق ایک سوال کے جواب میں سپیکر پنجاب اسمبلی کا کہنا تھا کہ جتنے زیادہ انتظامی یونٹس یا صوبے قائم کیے جائیں گے، ان کے انتظامات چلانے اور انفراسٹرکچر کے لیے اتنے ہی زیادہ مالی وسائل اور بجٹ کی ضرورت ہوگی، اس لیے نئے صوبوں کے قیام کے اس انتہائی حساس معاملے پر جذبات کے بجائے ملکی اخراجات، معاشی حقیقتوں اور دستیاب وسائل کو مدنظر رکھتے ہوئے ایک قابلِ عمل لائحہ عمل اختیار کیا جانا چاہیے۔