بنوں میں کنگر پل پولیس چوکی پر دہشت گردوں کا حملہ ناکام، 4 خوارج ہلاک

بنوں میں کنگر پل پولیس چوکی پر دہشت گردوں کا حملہ پولیس کے جرأت مندانہ اور بروقت اقدام سے ناکام بنا دیا گیا، جبکہ پولیس کی شدید جوابی کارروائی کے نتیجے میں 4 خوارج ہلاک ہو گئے۔

پولیس حکام کے مطابق بنوں پولیس کی بروقت کارروائی سے دہشت گردوں کا یہ بڑا حملہ کامیابی سے پسپا کر دیا گیا۔ اطلاعات کے مطابق خوارج نے نصف شب کے وقت کنگر پل پولیس چوکی کو نشانہ بنانے کی مذموم کوشش کی تھی۔ چوکی پر تعینات انتہائی چوکس پولیس اہلکاروں نے فوری طور پر مورچے سنبھال کر حملے کا بھرپور اور مؤثر جواب دیا، اور حملے کی اطلاع ملتے ہی پولیس کے تازہ دم دستے بھی فوری طور پر موقع پر پہنچ گئے۔

پولیس کے مطابق واقعے کے بعد کوئیک رسپانس فورس (QRF) اور کاؤنٹر ٹیررازم ڈیپارٹمنٹ (سی ٹی ڈی) نے مشترکہ طور پر علاقے میں مکمل کلیئرنس آپریشن کیا، جس کے دوران فائرنگ کے تبادلے میں ہلاک ہونے والے 4 خوارج کی لاشیں برآمد کر لی گئیں۔ ہلاک ہونے والے دہشت گردوں کے قبضے سے بھاری مقدار میں اسلحہ اور گولہ بارود (ایمونیشن) بھی برآمد ہوا ہے، جبکہ ہلاک دہشت گردوں کی شناخت کا عمل فی الحال جاری ہے۔

آئی جی خیبرپختونخوا ذوالفقار حمید نے بنوں پولیس کی اس بروقت اور بہادرانہ کارروائی پر انہیں زبردست شاباش دی ہے۔ انہوں نے کہا کہ رات کی تاریکی میں اس بڑے حملے کو پسپا کرنا پولیس جوانوں کی اعلیٰ ترین پیشہ ورانہ تربیت اور شجاعت کا روشن ثبوت ہے، اور خیبرپختونخوا کی سر زمین پر دہشت گردوں کے لیے کوئی جگہ نہیں ہے۔

دریں اثنا، وفاقی وزیرِ داخلہ محسن نقوی نے بھی بنوں میں پولیس چوکی پر خوارجیوں کا حملہ ناکام بنانے پر کے پی پولیس اور سی ٹی ڈی کے افسران و جوانوں کی کارکردگی کو سراہا۔ وزیرِ داخلہ نے کہا کہ خیبرپختونخوا پولیس اور سی ٹی ڈی کے بہادر سپوتوں نے بے مثال جرأت کا مظاہرہ کرتے ہوئے خوارج کا ناپاک عزائم کو خاک میں ملا دیا، پوری قوم کو اپنے ان بہادر سپوتوں پر فخر ہے۔