آؤٹ لک اور کوپائلٹ سمیت مائیکروسافٹ کی سروسز 24 گھنٹے کے تعطل کے بعد مکمل بحال

مائیکروسافٹ نے باضابطہ اعلان کیا ہے کہ گزشتہ 24 گھنٹوں سے زائد عرصے سے جاری تکنیکی خرابی اور تعطل کے بعد کمپنی کی مختلف اہم آن لائن سروسز کو مکمل طور پر بحال کر دیا گیا ہے، جس کے بعد اب ٹیمز، آؤٹ لک اور کوپائلٹ سمیت تمام متاثرہ ایپلی کیشنز بحفاظت کام کر رہی ہیں۔

ٹیکنالوجی جائنٹ مائیکروسافٹ کی جانب سے جاری کردہ بیان میں بتایا گیا ہے کہ تمام متاثرہ سروسز کی بحالی کا پیچیدہ عمل کامیابی کے ساتھ مکمل کر لیا گیا ہے، اور دنیا بھر کے صارفین اب کسی بھی رکاوٹ کے بغیر معمول کے مطابق ان تمام ڈیجیٹل ایپلیکیشنز کو استعمال کر سکتے ہیں۔

رپورٹس کے مطابق مائیکروسافٹ کی ان سروسز میں یہ تکنیکی تعطل 24 گھنٹے سے بھی زائد وقت تک جاری رہا، جس کے باعث عالمی سطح پر کاروباری اداروں، سرکاری محکموں، تعلیمی اداروں اور دیگر تنظیموں کے آن لائن روزمرہ رابطوں اور اہم ترین دفتری سرگرمیوں کو شدید مشکلات کا سامنا کرنا پڑا تھا۔

اس بڑی بندش کے دوران بالخصوص مائیکروسافٹ ٹیمز کے ذریعے شیڈول کی جانے والی آن لائن میٹنگز، آؤٹ لک کی ای میل سروس اور جدید اے آئی ٹول کوپائلٹ کے استعمال میں شدید رکاوٹیں پیدا ہوئی تھیں، تاہم اب سروسز کی مکمل بحالی سے صارفین نے نے سکھ کا سانس لیا ہے۔