میٹرک سالانہ امتحانات 2027 کا شیڈول جاری

پنجاب بورڈز کمیٹی آف چیئرمین (PBCC) نے میٹرک سالانہ امتحانات 2027 کے حتمی شیڈول کی باضابطہ منظوری دے دی ہے، جس کے مطابق صوبہ بھر میں دسویں جماعت کے سالانہ امتحانات کا آغاز 16 مارچ 2027 سے کیا جائے گا۔

پنجاب بورڈز کمیٹی آف چیئرمین کی جانب سے جاری کردہ نوٹیفکیشن کے مطابق میٹرک امتحانات 2027 کے لیے سنگل فیس کے ساتھ داخلہ فارم جمع کرانے کی آخری تاریخ 11 دسمبر 2026 مقرر کی گئی ہے۔

نوٹیفکیشن میں واضح کیا گیا ہے کہ جو طلبه مقررہ تاریخ تک سنگل فیس کے ساتھ فارم جمع نہ کرا سکیں، وہ ڈبل فیس کے ساتھ 12 دسمبر سے 28 دسمبر 2026 تک اپنے داخلہ فارم جمع کروا سکیں گے، جبکہ ٹرپل فیس کے ساتھ داخلہ فارم جمع کرانے کی حتمی آخری تاریخ 11 جنوری 2027 مقرر کی گئی ہے۔

پی بی سی سی کے منظور کردہ اس تفصیلی شیڈول کے تحت دسویں جماعت کے سالانہ امتحانات 16 مارچ 2027 سے باقاعدہ شروع ہوں گے، جبکہ امتحانات کے اختتام کے بعد میٹرک سالانہ امتحانات 2027 کے حتمی نتائج کا اعلان 20 جولائی 2027 کو کیا جائے گا۔

متعلقہ تعلیمی بورڈز نے امتحانات میں شرکت کے خواہشمند تمام ریگولیٹڈ اور پرائیویٹ طلبہ کو ہدایت کی ہے کہ وہ کسی بھی اضافی مالی بوجھ یا پریشانی سے بچنے کے لیے مقررہ تاریخوں کے اندر اندر اپنے داخلہ فارم لازمی جمع کرائیں۔