عدلیہ کے فیصلے کی خلاف ورزی ہوئی تو سڑکوں پر نکلیں گے: سہیل آفریدی

وزیراعلیٰ خیبرپختونخوا سہیل آفریدی نے واضح کیا ہے کہ عدلیہ کے فیصلے پر من و عن عملدرآمد کیا جائے گا اور خبردار کیا کہ اگر عدالتی فیصلے پر عمل نہ ہوا تو پھر فیصلہ سڑکوں پر ہوگا۔ ایک نجی ٹی وی پروگرام میں گفتگو کرتے ہوئے انہوں نے کہا کہ خیبرپختونخوا اسمبلی کے 92 ارکان ان کے ساتھ چٹان کی طرح کھڑے ہیں اور انہیں کوئی خرید نہیں سکتا۔

سہیل آفریدی نے مزید کہا کہ بانی پی ٹی آئی عمران خان کسی قسم کی ڈیل نہیں کریں گے اور نہ ہی ان کے بیرون ملک جانے کا سوال پیدا ہوتا ہے، وہ صرف عدلیہ کے ذریعے رہا ہونا چاہتے ہیں۔ نئے صوبوں کی تشکیل کے حوالے سے بات کرتے ہوئے انہوں نے کہا کہ اس پر اربوں روپے کے اخراجات آئیں گے اور بانی پی ٹی آئی کی رائے کے بغیر اس معاملے پر مشاورت نہیں کی جائے گی۔ اس کے ساتھ انہوں نے وفاقی حکومت پر سخت تنقید کرتے ہوئے کہا کہ حکمران مکمل ناکام ہو چکے ہیں اور نظام معاشی کولیپس کی طرف بڑھ رہا ہے۔