فیض حمید کی سزا ادارے کا اندرونی معاملہ، فوجی سپورٹ کے باوجود ملک کی صورتحال خراب، سہیل آفریدی

پشاور: وزیراعلیٰ سہیل آفریدی نے کہا ہے کہ سابق ڈی جی آئی ایس آئی فیض حمید ایک ادارے کے ملازم تھے، اگر انہیں کسی معاملے پر سزا دی گئی ہے تو یہ مکمل طور پر ادارے کا اندرونی معاملہ ہے، اس پر تبصرہ نہیں کریں گے۔ البتہ سیاسی معاملات پر بھرپور جواب دیں گے۔

سہیل آفریدی نے شہباز شریف کی پالیسیوں پر تنقید کرتے ہوئے کہا کہ ماضی میں شہباز شریف دعویٰ کرتے تھے کہ اگر فوج کی 30 فیصد حمایت مل جائے تو پاکستان کو پیرس بنا دیں گے، لیکن آج انہیں مکمل سپورٹ حاصل ہے اس کے باوجود وہ حکومت کی ناکامیوں پر الزامات بھی لگا رہے ہیں، پریس کانفرنسیں بھی کر رہے ہیں اور حالات بہتر نہیں ہو رہے۔

انہوں نے کہا کہ ’’اتنی سپورٹ کے باوجود ملک کا یہ حال ہے کہ نوجوان بیرونِ ملک جا رہے ہیں، جبکہ سرمایہ کار اپنی فیکٹریاں چھوڑ کر ملک سے نکل رہے ہیں۔‘‘