بلاول مانیں میرے ساتھ جو ہو رہا ان کی حکومت کر رہی ہے: سہیل آفریدی

ٹنڈوجام: وزیراعلیٰ خیبر پختونخوا سہیل آفریدی نے پیپلزپارٹی کے چیئرمین بلاول بھٹو زرداری کو مخاطب کرتے ہوئے کہا ہے کہ وہ اس بات کا اعتراف کریں کہ سندھ آمد کے بعد ان کے ساتھ جو سلوک اور رکاوٹیں کھڑی کی جا رہی ہیں، وہ ان کی صوبائی حکومت کر رہی ہے۔

سندھ کے علاقے ٹنڈوجام ٹول پلازہ پر پارٹی کارکنان سے خطاب کرتے ہوئے وزیراعلیٰ کے پی سہیل آفریدی نے اعلان کیا کہ 27 ستمبر کو تاریخی مارچ کا انعقاد کیا جائے گا۔ انہوں نے رکاوٹوں کے باوجود استقبال کے لیے پہنچنے والے کارکنوں کا شکریہ ادا کرتے ہوئے کہا کہ سندھ کی روایت ہمیشہ سے مہمانوں کے پرخلوص استقبال کی رہی ہے، لیکن ان کے ساتھ جو رویہ اپنایا جا رہا ہے وہ سندھ کی ثقافت اور سیاسی روایات کے منافی ہے۔

سہیل آفریدی نے کہا کہ ایسا محسوس ہوتا ہے کہ حلافی حکومت نہیں چاہتی کہ وہ کراچی پہنچیں، تاہم انہوں نے واضح کیا کہ راستے میں جتنی بھی رکاوٹیں ڈالی جائیں، وہ کراچی ہر صورت پہنچیں گے۔ انہوں نے عزم کا اظہار کرتے ہوئے کہا کہ اگر وہ آج کراچی نہ پہنچ سکے تو کل پہنچیں گے، لیکن کراچی پہنچے بغیر سندھ سے واپس نہیں جائیں گے۔