سندھ حکومت کی تھر ڈزرٹ ٹرین سفاری کل روانہ، سیاحتی تفریح کا آغاز

کراچی: سندھ حکومت کی جانب سے خصوصی تھر ڈزرٹ ٹرین سفاری کل کراچی سے روانہ ہو گی۔ محکمہ سیاحت سندھ کے مطابق انتظامات مکمل کر لیے گئے ہیں اور دو سو سے زائد مسافر، جن میں فیملیز، بچے اور سیاحت سے وابستہ افراد شامل ہیں، اس خصوصی ٹرین میں شرکت کریں گے۔

ٹرین حیدرآباد، میرپورخاص اور عمرکوٹ سے ہو کر زیرو پوائنٹ پہنچے گی، جہاں شرکاء رات کو پرچی جی ویری کے مقام پر میوزیکل ایونٹ اور مقامی دیسی کھانوں سے لطف اندوز ہوں گے۔ دوسرے روز صبح ٹرین پرچی جی ویری سے واپس کراچی کے لیے روانہ ہو جائے گی، اور شرکاء کے لیے صبح کا ناشتہ اور دیگر کھانے پینے کا انتظام بھی کیا گیا ہے۔

محکمہ سیاحت کے ترجمان کے مطابق بزنس کلاس میں مسافر پرسکون ماحول میں سندھ کے سیاحتی مقامات سے لطف اندوز ہوں گے۔ وزیر سیاحت سید ذوالفقار علی شاہ نے کہا کہ تھر ڈزرٹ ٹرین سفاری عوام کے لیے بہترین تحفہ ہے اور محکمہ سیاحت سندھ صوبے کے سیاحتی مقامات کو اجاگر کرنے کے لیے کوشاں ہے۔

وزیر سیاحت نے مزید بتایا کہ ٹرین کو دوسرے مرحلے میں موئن جو دڑو اور سکھر تک چلانے کا منصوبہ ہے تاکہ زیادہ سے زیادہ سیاح اس سہولت سے فائدہ اٹھا سکیں۔