سندھ حکومت نے دفتری اوقات کی سختی سے پابندی کا حکم جاری کر دیا

سندھ حکومت نے سرکاری دفاتر میں تاخیر سے آمد پر سخت برہمی کا اظہار کرتے ہوئے تمام محکموں کے افسران کو صبح 9 بجے دفتر پہنچنے کا پابند کر دیا ہے۔ اس سلسلے میں جاری کردہ ہدایات میں کہا گیا ہے کہ سرکاری افسران وقت کی پابندی ہر صورت یقینی بنائیں تاکہ بہتر سروس ڈلیوری ممکن ہو سکے۔
حکومت کی جانب سے واضح کیا گیا ہے کہ دفتری اوقات کی خلاف ورزی کرنے والے افسران کے خلاف کارروائی کا امکان ہے۔

سیکشن افسر کی جانب سے جاری مراسلے میں تمام افسران کو ہدایت کی گئی ہے کہ صبح 9 بجے حاضری ہر حال میں یقینی بنائی جائے تاکہ سرکاری کاموں میں تاخیر کا خاتمہ ہو اور عوام کو بہتر خدمات فراہم کی جا سکیں۔