شپنگ انڈسٹری پر 18 فیصد سیلز ٹیکس کا خاتمہ تاریخی ریلیف ہے: وفاقی بحری امور

وفاقی وزیر برائے بحری امور محمد جنید انور چوہدری نے ملکی تجارتی اور لاجسٹکس کے شعبے کے لیے ایک بڑے اور تاریخی بریک تھرو کا اعلان کیا ہے۔ وفاقی بجٹ 27-2026ء کی تجاویز کے حوالے سے گفتگو کرتے ہوئے انہوں نے بتایا کہ حکومت نے مقامی اور عالمی تجارتی زنجیر کو سہارا دینے کے لیے شپنگ انڈسٹری پر عائد 18 فیصد سیلز ٹیکس کو مکمل طور پر ختم کرنے کا حتمی فیصلہ کر لیا ہے۔

 وفاقی وزیر کا کہنا تھا کہ شپنگ سیکٹر کو دیے گئے اس بھاری ٹیکس ریلیف کے نتیجے میں ملکی اور غیر ملکی بلیو اکانومی (Blue Economy) میں سرمایہ کاری کے شاندار اور نئے مواقع پیدا ہوں گے۔ پورٹس اور جہاز رانی پر سیلز ٹیکس کے خاتمے کا سب سے بڑا فائدہ ملکی تاجروں اور صنعت کاروں کو ہوگا، کیونکہ اس سے خام مال اور تیار شدہ مصنوعات کی نقل و حمل (درآمدی و برآمدی لاگت) میں واضح کمی آئے گی، جس سے پاکستانی مصنوعات عالمی مارکیٹ میں مسابقتی بن سکیں گی۔

 “محمد جنید انور چوہدری نے واضح کیا کہ اس اقدام سے مقامی شپنگ لائنز اور لاجسٹکس کمپنیوں کے کاروباری حجم میں اضافہ ہوگا، جس سے نہ صرف ملکی معیشت کو پائیدار فائدہ پہنچے گا بلکہ شپنگ سروسز، گوداموں اور بندرگاہوں کے انتظام سے وابستہ ہزاروں نوجوانوں کے لیے روزگار کے نئے اور باوقار مواقع بھی پیدا ہوں گے”۔

وفاقی وزیرِ بحری امور نے معاشی دباؤ کے اس دور میں انڈسٹری کی دیرینہ مانگ کو بجٹ کا حصہ بنانے پر وزیراعظم اور معاشی ٹیم کا شکریہ ادا کیا، جبکہ انہوں نے ملکی تاجروں، امپورٹرز، ایکسپورٹرز اور چیمبرز آف کامرس کی کاروباری برادری کو اس تاریخی اور گیم چینجر ٹیکس ریلیف پر خصوصی مبارکباد بھی پیش کی ہے۔