شیخوپورہ میں مقابلہ، لاہور میں اہلکاروں کو شہید کرنیوالے 2 دہشتگرد مارے گئے، 4 زخمی

شیخوپورہ میں راوی ریان کے قریب کاؤنٹر ٹیریرازم ڈیپارٹمنٹ (سی ٹی ڈی) اور دہشت گردوں کے درمیان فائرنگ کے شدید تبادلے میں 2 دہشت گرد ہلاک جبکہ 4 زخمی ہو گئے۔ پولیس ذرائع کے مطابق ہلاک ہونے والے دہشت گردوں میں خطرناک ملزم ریحان بٹ بھی شامل ہے، جس نے لاہور کے علاقوں بادامی باغ اور نواں کوٹ میں پولیس اہلکاروں پر فائرنگ کر کے 3 اہلکاروں کو شہید اور 2 کو زخمی کر دیا تھا۔ واقعے کے بعد لاہور سمیت پنجاب بھر میں ناکہ بندی اور سرچ آپریشن جاری تھا، جس کے دوران ملزمان کو شیخوپورہ کی حد میں گھیر لیا گیا۔ پولیس حکام کا کہنا ہے کہ مارے گئے دہشت گردوں کا تعلق ٹارگٹ کلرز گروہ سے تھا، جبکہ واقعے کے بعد فرار ہونے والے دیگر ساتھیوں کی گرفتاری کے لیے مزید کارروائی شروع کر دی گئی ہے