وزیراعظم شہباز شریف اور ایرانی صدر مسعود پزشکیان کی 30 منٹ طویل گفتگو

لاہور: شہباز شریف کو اسلامی جمہوریہ ایران کے صدر مسعود پزشکیان کی جانب سے عیدالاضحیٰ کے موقع پر ٹیلیفون کال موصول ہوئی۔
تقریباً 30 منٹ جاری رہنے والی گرمجوش اور دوستانہ گفتگو کے دوران دونوں رہنماؤں نے ایک دوسرے، دونوں ممالک کے عوام اور پوری مسلم اُمہ کو عیدالاضحیٰ کی مبارکباد دی اور نیک خواہشات کا اظہار کیا۔
ایرانی صدر نے خطے میں امن کے قیام کی کوششوں میں پاکستان کے کردار کو سراہتے ہوئے وزیراعظم اور فیلڈ مارشل سید عاصم منیر کا شکریہ ادا کیا۔ انہوں نے سعودی عرب، قطر اور ترکیہ سمیت دیگر علاقائی ممالک کی امن کوششوں کو بھی قابلِ تحسین قرار دیا۔
وزیراعظم شہباز شریف نے موجودہ بحران کے دوران قیمتی ایرانی جانوں کے ضیاع پر ایرانی عوام اور قیادت کے ساتھ مکمل یکجہتی کا اظہار کیا اور کہا کہ پاکستان ہمیشہ ایران کے ساتھ کھڑا رہے گا۔
وزیراعظم نے امید ظاہر کی کہ امن معاہدہ جلد طے پا جائے گا اور خطے میں پائیدار امن و استحکام قائم ہوگا، جس سے ایران سمیت پورا خطہ معاشی ترقی سے مستفید ہوگا۔
دونوں رہنماؤں نے باہمی رابطے اور قریبی مشاورت جاری رکھنے پر اتفاق بھی کیا۔