شرجیل میمن کا سوشل میڈیا پر مبینہ کردار کشی کے خلاف این سی سی آئی اے سے رجوع

سینئر وزیر سندھ شرجیل انعام میمن نے اپنے اور اپنے بیٹے کے خلاف سوشل میڈیا پر مبینہ طور پر جھوٹا، بے بنیاد اور بدنیتی پر مبنی مواد نشر کرنے کے معاملے پر نیشنل سائبر کرائم انویسٹی گیشن ایجنسی (NCCIA) سے باقاعدہ رجوع کر لیا ہے۔ این سی سی آئی اے کو جمع کرائی گئی درخواست میں موقف اختیار کیا گیا ہے کہ سوشل میڈیا کے مختلف پلیٹ فارمز پر ان کی اور ان کے بیٹے کی کردار کشی کے لیے من گھڑت الزامات پھیلائے جا رہے ہیں۔ درخواست میں 4 فیس بک اکاؤنٹس اور پیجز کی نشاندہی کرتے ہوئے ان کے خلاف سخت قانونی کارروائی کی استدعا کی گئی ہے اور ثبوت کے طور پر سکرین شاٹس بھی شامل کیے گئے ہیں۔

واضح رہے کہ سوشل میڈیا پر یہ الزام عائد کیا گیا تھا کہ میر رضا پر جس گیسٹ ہاؤس میں تشدد کا واقعہ پیش آیا، وہ شرجیل میمن کی ملکیت ہے، جبکہ ان کے بیٹے کے ملک سے باہر جانے سے متعلق خبریں بھی گردش کر رہی تھیں۔ شرجیل میمن نے ان تمام دعوؤں کو سراسر بے بنیاد قرار دیتے ہوئے کہا ہے کہ گیسٹ ہاؤس کی ملکیت اور بیٹے راول میمن کے لندن روانہ ہونے سے متعلق تمام باتیں حقائق کے بالکل منافی ہیں اور اس پروپیگنڈے کا مقصد ان کی سیاسی و شخصی شہرت کو نقصان پہنچانا ہے۔