ملتان میں مبینہ زیادتی و رابری کا ڈراپ سین، وقوعہ منصوبہ بندی کے تحت رچایا گیا

ملتان کے علاقے شاہ شمس میں مبینہ زیادتی اور ڈکیتی کیس کا ڈراپ سین ہو گیا ہے، جہاں پولیس کی جانب سے کی گئی تفتیش میں یہ بات سامنے آئی ہے کہ یہ وقوعہ مخالفین کو پھنسانے کے لیے منصوبہ بندی کے تحت خود رچایا گیا تھا۔ پولیس نے معاملے کے مرکزی کردار عابد کو گرفتار کر لیا ہے۔

ترجمان ملتان پولیس کے مطابق، کاروباری تنازع پر مخالف فریق کو سنگین مقدمے میں ملوث کرنے کے لیے ایک جوڑے کو 2 لاکھ روپے میں جعلی وقوعہ رچانے کے لیے تیار کیا گیا تھا، جس میں سے ملزم عابد نے 30 ہزار روپے ایڈوانس رقم ادا کی تھی۔ پولیس نے تکنیکی شواہد اور ابتدائی طبی معائنے کی مدد سے اس بات کی تصدیق کی کہ کیس مکمل طور پر خود ساختہ تھا۔

ترجمان کے مطابق منصوبہ بندی میں شامل ڈرامائی جوڑا اس وقت فرار ہے اور ان کی گرفتاری کے لیے پولیس کی ٹیمیں مختلف مقامات پر چھاپے مار رہی ہیں۔ ملتان پولیس کا کہنا ہے کہ فرار ملزمان کے خلاف اینٹی ریپ (انویسٹی گیشن اینڈ ٹرائل) ایکٹ 2021 کے تحت سخت قانونی کارروائی کی جائے گی۔