عید پر ملک بھر میں گرمی کی شدید لہر کا امکان، محکمہ موسمیات کی وارننگ

محکمہ موسمیات نے عیدالاضحیٰ کے موقع پر ملک بھر میں شدید گرمی کی لہر کا خدشہ ظاہر کرتے ہوئے شہریوں کو احتیاطی تدابیر اختیار کرنے کا مشورہ دیا ہے۔

محکمہ کے مطابق سندھ اور جنوبی پنجاب کے میدانی علاقے شدید ترین گرمی کی لپیٹ میں رہیں گے جہاں درجہ حرارت 47 سے 50 ڈگری سینٹی گریڈ تک پہنچ سکتا ہے۔

اعداد و شمار کے مطابق منگل کے روز جیکب آباد ملک کا گرم ترین علاقہ رہا جہاں درجہ حرارت 50 ڈگری سینٹی گریڈ ریکارڈ کیا گیا۔

رپورٹ میں بتایا گیا ہے کہ تربت اور بہاولنگر میں 48، سبی، دادو، لاڑکانہ اور موئن جو دڑو میں 47، سکھر میں 46، ملتان اور ڈیرہ غازی خان میں 45 جبکہ ڈیرہ اسماعیل خان میں 44 ڈگری سینٹی گریڈ ریکارڈ کیا گیا۔

اسی طرح لاہور میں 42، اسلام آباد میں 40، پشاور میں 38، کراچی اور کوئٹہ میں 36، مظفرآباد میں 35 اور گلگت میں 29 ڈگری سینٹی گریڈ زیادہ سے زیادہ درجہ حرارت ریکارڈ کیا گیا۔