پاکستان اور ترکیہ کے درمیان لائیو سٹاک شعبے میں اہم پیشرفت

پاکستان اور ترکیہ کے درمیان لائیو اسٹاک (مویشی پروری) کے شعبے کی ترقی اور جدید ٹیکنالوجی کی منتقلی کے حوالے سے ایک اہم اور پیش رفت پر مبنی پیشکش سامنے آئی ہے۔

اسلام آباد میں وفاقی وزیر برائے قومی غذائی تحفظ و تحقیق رانا تنویر حسین اور ترکیہ کے سفیر ڈاکٹر عرفان نذیر اوغلو کے درمیان ایک اہم ملاقات ہوئی، جس میں لائیو اسٹاک سیکٹر کی ترقی، ویکسین کی مقامی سطح پر تیاری اور پاکستانی ماہرین کی تکنیکی تربیت کے اہم امور پر تفصیلی تبادلہ خیال کیا گیا۔

مجوزہ شراکت داری کے تحت 100 پاکستانی ماہرین اور تکنیکی عملے کو تربیت فراہم کرنے کا منصوبہ تیار کیا گیا ہے، جس کے پہلے مرحلے میں 30 افراد پر مشتمل پہلے بیچ کو خصوصی تربیت کے لیے ترکیہ بھیجا جائے گا۔ علاوہ ازیں، ترکیہ کی تکنیکی معاونت سے پاکستان میں مویشیوں کی مہلک بیماری “منہ کھر” (Foot-and-Mouth Disease) سے بچاؤ کی جدید ویکسین بھی مقامی سطح پر تیار کی جائے گی۔ حکام کے مطابق اس اقدام سے نہ صرف جانوروں کی صحت بہتر ہو گی بلکہ پاکستان میں بیماری سے پاک مخصوص زونز کا قیام عمل میں لایا جا سکے گا جس سے بین الاقوامی سطح پر گوشت (Meat) کی برآمدات میں خاطر خواہ اضافہ ہو گا۔