کم عمری کی شادی کے خلاف پشاور ہائیکورٹ میں آئینی درخواست دائر

خیبر پختونخوا میں لڑکیوں کی شادی کی کم از کم قانونی عمر 16 سال سے بڑھا کر 18 سال مقرر کرنے کے لیے پشاور ہائیکورٹ میں ایک اہم آئینی درخواست دائر کر دی گئی ہے۔

بچوں کے حقوق کے لیے سرگرم عمل دو کم عمر بچیوں کی جانب سے دائر کی گئی اس آئینی درخواست میں مؤقف اختیار کیا گیا ہے کہ خیبر پختونخوا ملک کا واحد صوبہ ہے جہاں لڑکیوں کی شادی کی کم از کم قانونی عمر اب بھی 16 سال ہے، جبکہ اس کے برعکس پنجاب، سندھ اور بلوچستان میں قانون سازی کے ذریعے یہ حد 18 سال مقرر کی جا چکی ہے۔ درخواست گزاروں نے عدالت عالیہ سے استدعا کی ہے کہ وہ صوبائی حکومت کو کم عمری کی شادی کی روک تھام اور لڑکیوں کے لیے 18 سال کی حد طے کرنے کے لیے فوری قانون سازی کی ہدایت جاری کرے۔

درخواست میں موقف اپنایا گیا کہ گزشتہ دو دہائیوں سے مختلف حکومتی وعدوں کے باوجود صوبے میں اس معاملے پر جامع قانون سازی نہیں ہو سکی۔ یونیسف (UNICEF) کے اعدادوشمار کے مطابق پاکستان میں تقریباً 21 فیصد لڑکیوں کی شادی 18 سال سے کم عمر میں کر دی جاتی ہے، جس کے ان کی تعلیم، ذہنی و جسمانی صحت اور مستقبل پر گہرے منفی اثرات مرتب ہوتے ہیں۔ درخواست گزاروں نے زور دیا کہ بچیوں کے بنیادی انسانی و آئینی حقوق کے تحفظ کے لیے مؤثر اور یکساں قانون سازی وقت کی اہم ضرورت ہے۔