ایس ای سی پی نے کپیٹل مارکیٹ پر رپورٹ جاری کر دی

اسلام آباد: سیکیورٹیز اینڈ ایکسچینج کمیشن آف پاکستان (SECP) نے مالی سال کی تیسری سہ ماہی کے لیے کیپیٹل مارکیٹ کی تفصیلی رپورٹ جاری کر دی ہے۔ رپورٹ کے مطابق عالمی معاشی بحران اور امریکہ و ایران کے درمیان جنگی صورتحال کے باوجود پاکستان کی کیپیٹل مارکیٹ مجموعی طور پر مستحکم رہی، تاہم جغرافیائی و سیاسی تناؤ نے مارکیٹ پر اپنے اثرات مرتب کیے ہیں۔
مارکیٹ انڈیکس اور کیپٹلائزیشن:
رپورٹ میں بتایا گیا ہے کہ عالمی حالات کی وجہ سے برینٹ خام تیل کی قیمتوں میں 13 فیصد اور امریکی سافٹ ویئر اسٹاکس میں 23 فیصد تک کمی واقع ہوئی۔ پاکستان اسٹاک ایکسچینج کا کے ایس ای 100 انڈیکس جنوری میں 191,033 کی تاریخی بلند ترین سطح پر پہنچا، تاہم سہ ماہی کے اختتام پر یہ 148,743 پوائنٹس پر بند ہوا۔ اس دوران اسٹاک مارکیٹ میں مجموعی طور پر 14.54 فیصد کمی ریکارڈ کی گئی، جبکہ مارکیٹ کیپٹلائزیشن 19.69 کھرب روپے سے کم ہو کر 16.53 کھرب روپے رہ گئی۔
مقامی سرمایہ کاروں کا اہم کردار:
ایس ای سی پی کے مطابق غیر ملکی سرمایہ کاروں نے مارکیٹ سے 111.61 ارب روپے کے حصص فروخت کیے، لیکن مقامی سرمایہ کاروں نے اس دباؤ کو سنبھالا اور 111.55 ارب روپے کی خالص خریداری کر کے مارکیٹ کو سہارا دیا۔ مقامی سرمایہ کاری کی تفصیل درج ذیل ہے:
کمپنیاں: 73.51 ارب روپے
میوچل فنڈز: 23.78 ارب روپے
انفرادی سرمایہ کار: 20.25 ارب روپے
تجارتی حجم اور نیلامی:
ٹریڈنگ کے لحاظ سے نیشنل بینک (NBP) 182.42 ارب روپے کے حجم کے ساتھ سرفہرست رہا۔ جنوری سے مارچ کے دوران پرائمری مارکیٹ میں 3 نئے آئی پی اوز (IPOs) ہوئے، جبکہ دو نجی سکوک بھی لسٹ کیے گئے۔ حکومتی اجارہ سکوک نیلامی میں مجموعی طور پر 811.53 ارب روپے کی سرمایہ کاری ہوئی، جبکہ ڈیٹ مارکیٹ میں 185.14 ارب روپے کی سرمایہ کاری ریکارڈ کی گئی۔ پاکستان اسٹاک ایکسچینج کی بلز اینڈ بانڈز مارکیٹ میں اس سہ ماہی کے دوران 260.94 ارب روپے کا کاروبار ہوا۔