ایرانی حملے خطے کو کشیدگی کی طرف دھکیل رہے ہیں، دفاع کا حق محفوظ رکھتے ہیں، سعودی عرب

سعودی عرب کی وزارت خارجہ نے ریاض میں امریکی سفارت خانے کی عمارت کو نشانہ بنانے کے واقعے پر شدید ردعمل دیتے ہوئے کہا ہے کہ ایران کے مسلسل اقدامات پورے خطے کو خطرناک کشیدگی کی طرف لے جا رہے ہیں۔

وزارت خارجہ کے جاری کردہ اعلامیے میں کہا گیا ہے کہ ایسے حملے بین الاقوامی قوانین کی صریح خلاف ورزی ہیں اور سفارتی عمارتوں کے تحفظ سے متعلق عالمی معاہدوں کے منافی ہیں۔ سعودی عرب نے اس بات پر زور دیا کہ سفارتی مشنز اور عملے کو ہر صورت تحفظ حاصل ہونا چاہیے۔

اعلامیے میں کہا گیا ہے کہ اس نوعیت کے بزدلانہ اور بلاجواز حملے بین الاقوامی قوانین اور ضوابط کی کھلی خلاف ورزی ہیں، جن میں 1949کا جنیوا کنونشن اور 1961 کا ویانا کنونشن برائے سفارتی تعلقات بھی شامل ہیں، جو سفارتی عمارتوں اور عملے کو استثنیٰ فراہم کرتے ہیں، حتیٰ کہ مسلح تنازعات کے دوران بھی۔

اعلامیے میں کہا گیا ہے کہ مملکت اپنی سرزمین اور فضائی حدود کو کسی بھی فریق کے خلاف استعمال ہونے کی اجازت نہیں دے گی، تاہم اپنی سلامتی، شہریوں اور قومی مفادات کے تحفظ کے لیے تمام ضروری اقدامات کرنے کا حق محفوظ رکھتی ہے۔

وزارت خارجہ نے واضح کیا کہ سعودی عرب خطے میں استحکام کا خواہاں ہے، مگر اگر جارحیت جاری رہی تو مناسب جواب دینے کا اختیار برقرار رکھا جائے گا۔