ایرانی حملے جاری رہے تو نقصان کا خود ذمہ دار ہوگا: سعودی عرب

سعودی عرب نے خبردار کیا ہے کہ اگر ایران کے حملے جاری رہے تو اس کے نتیجے میں سب سے زیادہ نقصان خود تہران کو برداشت کرنا پڑے گا۔

سعودی وزارت خارجہ نے ایران کی جانب سے سعودی عرب اور دیگر خلیجی، عرب اور اسلامی ممالک پر کیے گئے حملوں کی سخت مذمت کرتے ہوئے انہیں گھناؤنا قرار دیا ہے۔

سعودی عرب نے امریکا اور اسرائیل کے ساتھ ایران کی جاری کشیدگی کے دوران اپنی پہلی اموات کی بھی تصدیق کی ہے۔ حکام کے مطابق ایک گولہ رہائشی علاقے میں گرنے سے ایک بھارتی اور ایک بنگلہ دیشی شہری ہلاک ہو گئے جبکہ 12 دیگر بنگلہ دیشی زخمی ہو گئے۔

وزارت خارجہ کے مطابق شہری مقامات، ایئرپورٹس اور تیل کی تنصیبات کو نشانہ بنانا خطے کے امن و استحکام کے لیے سنگین خطرہ ہے اور ایرانی حملے بین الاقوامی قوانین کی کھلی خلاف ورزی ہیں۔

سعودی وزارت خارجہ نے واضح کیا کہ ایران کے خلاف سعودی سرزمین استعمال نہیں ہوئی۔ بیان میں کہا گیا کہ ایرانی حملوں کا تسلسل خطے میں کشیدگی کو مزید بڑھا سکتا ہے اور اگر ایران نے یہی رویہ برقرار رکھا تو اس کے علاقائی تعلقات پر بھی منفی اثرات مرتب ہوں گے۔

سعودی عرب نے تنبیہ کی ہے کہ اگر ایران نے اپنا رویہ تبدیل نہ کیا تو اس کے سب سے زیادہ نتائج اور نقصان خود ایران کو ہی بھگتنا پڑے گا۔