تیل تنصیبات پر حملے کے ذمہ داروں کے خلاف کارروائی کا حق رکھتے ہیں: سعودی عرب

سعودی عرب کی وزارتِ خارجہ نے ملک کی اہم تیل کی تنصیبات کو نشانہ بنانے کی کوشش میں کیے گئے ڈرون حملوں کی شدید الفاظ میں مذمت کرتے ہوئے واضح کیا ہے کہ مملکت اس کارروائی کے ذمہ داروں کے خلاف مناسب وقت پر جواب دینے کا حق محفوظ رکھتی ہے۔ جاری کردہ بیان میں عراقی حکومت پر زور دیا گیا ہے کہ وہ اپنی سرزمین کو سعودی عرب کے خلاف دہشت گردانہ کارروائیوں کے لیے استعمال ہونے سے روکنے کے لیے فوری اور ضروری اقدامات کرے۔ یاد رہے کہ عراق کی حدود سے داغے گئے دو ڈرونز کو سعودی فضائی دفاعی نظام نے فضا میں ہی تباہ کر دیا تھا، جبکہ اس سے قبل سعودی افواج نے یمن کے حوثی کنٹرولڈ شہر الحدیدہ پر حملہ بھی کیا۔ دوسری جانب سعودی فوجی اتحاد کے ترجمان میجر جنرل ترکی المالکی نے خطے میں بڑھتی کشیدگی اور بحیرۂ احمر میں جہاز رانی پر حملوں کی تمام تر ذمہ داری حوثیوں پر عائد کی ہے۔