سندھ طاس معاہدے پر عالمی ثالثی عدالت کا فیصلہ پاکستان کی اہم کامیابی ہے: سرفراز بگٹی

کوئٹہ: وزیراعلیٰ بلوچستان میر سرفراز بگٹی نے سندھ طاس معاہدے (Indus Waters Treaty) سے متعلق عالمی ثالثی عدالت کے متفقہ فیصلے کو پاکستان کے مؤقف کی ایک اہم اور تاریخی قانونی و سفارتی کامیابی قرار دیا ہے۔

اپنے جاری کردہ ایک خصوصی بیان میں وزیراعلیٰ بلوچستان نے کہا کہ عالمی ثالثی عدالت کے متفقہ فیصلے نے یہ بات روزِ روشن کی طرح عیاں کر دی ہے کہ سندھ طاس معاہدہ بدستور نافذ العمل ہے اور بھارت اس کی قانونی پابندی کا پابند ہے۔ انہوں نے کہا کہ یہ فیصلہ پاکستان کے دیرینہ آبی حقوق کے تحفظ اور قومی مفادات کے حوالے سے ایک نہایت اہم پیش رفت ہے۔

میر سرفراز بگٹی کا کہنا تھا کہ پاکستان کے لیے سندھ طاس معاہدہ محض ایک دوطرفہ معاہدہ نہیں بلکہ ملک کی زراعت، آبی وسائل اور قومی سلامتی سے جڑا ایک عالمی قانونی انتظام ہے۔ انہوں نے زور دیا کہ عدالت کے فیصلے سے عالمی قوانین کی بالادستی اور معاہدوں کے احترام کا اصول مزید مضبوط ہوا ہے۔ وزیراعلیٰ نے اعادہ کیا کہ پاکستان اپنے تمام آبی حقوق کے تحفظ کے لیے آئینی، قانونی اور سفارتی ذرائع کا استعمال جاری رکھے گا۔