سمجھ نہیں آتی میرے لئے ٹرمپ کے دماغ میں اتنی جگہ کیوں ہے؟ میئر لندن

لندن: امریکی صدر ڈونلڈ ٹرمپ کے حالیہ بیانات پر لندن کے میئر صادق خان کا دلچسپ اور طنزیہ ردِ عمل سامنے آیا ہے، جس میں انہوں نے کہا ہے کہ وہ یہ سمجھنے سے قاصر ہیں کہ امریکی صدر کے دماغ میں ان کے لیے اتنی زیادہ جگہ کیوں ہے۔ میڈیا کو دیے گئے ایک بیان میں میئر صادق خان نے ہلکے پھلکے انداز میں ٹرمپ پر وار کرتے ہوئے کہا کہ “مجھے سمجھ نہیں آتا کہ صدر ٹرمپ مجھ میں اتنی دلچسپی کیوں لیتے ہیں، شاید ان کا مجھ پر دل آگیا ہے! اور اس کی بڑی وجہ یہ ہو سکتی ہے کہ میں ایک ایسے شہر کا میئر ہوں جو ترقی پسند، کثیر الثقافتی، آزاد خیال اور ہر محاذ پر کامیاب ہے”۔ صادق خان نے مزید کہا کہ گزشتہ ہفتے ہی لندن نے دنیا کے بہترین شہر کا معزز ’’لی کوان یو ورلڈ سٹی پرائز‘‘ (Lee Kuan Yew Prize) جیتا ہے، اور ایسا لگتا ہے کہ لندن کی یہ شاندار عالمی کامیابی صدر ٹرمپ کو شدید ناگوار گزری ہے، اسی لیے وہ مسلسل انہیں نشانہ بنا رہے ہیں۔