روس، یوکرین کا انسانی امداد اور شہریوں کے انخلا کیلئے کارروائیاں روکنے کا فیصلہ

روس اور یوکرین نے خیرسون ریجن کے شہر الیوشکی (Oleshky) میں انسانی امداد کی فراہمی اور شہریوں کے محفوظ انخلا کے لیے مقامی سطح پر جنگ بندی کے انتظامات پر اتفاق کر لیا ہے۔

روسی انسانی حقوق کی کمشنر یانا لانتراٹووا نے سوشل میڈیا پلیٹ فارم ‘میکس’ پر تصدیق کی ہے کہ انہوں نے یوکرین کے انسانی حقوق کے کمشنر دمتری لوبینیتس کے ساتھ مجوزہ انسانی مشن کے امور پر بات چیت کی ہے اور دونوں فریقین طے شدہ معاہدوں کی پاسداری کر رہے ہیں۔

اس سے قبل وائٹ ہاؤس نے اعلان کیا تھا کہ دونوں ممالک کے درمیان محدود علاقے کے لیے مقامی جنگ بندی کا معاہدہ طے پا گیا ہے تاکہ خوراک، ادویات اور بنیادی سامان پہنچایا جا سکے۔ امریکی انتظامیہ کے مطابق جنگ بندی 29 اکتوبر سے نافذ ہوگی جبکہ ایک آزاد امریکی میڈیا ادارہ اس مشن کو دستاویزی شکل دے گا۔ دوسری جانب روسی مسلح افواج کے چیف آف جنرل اسٹاف جنرل والیری گیراسیموف نے اعلان کیا کہ روسی فوج 27 اکتوبر سے ماسکو کے وقت کے مطابق صبح 4 بجے جنگ بندی نافذ کرے گی۔ دونوں اعلانات میں تاریخوں کا فرق ہے تاہم بنيادی مقصد انسانی امداد اور شہریوں کا انخلا ہے۔

خیرسون کے اس علاقے میں صورتحال طویل عرصے سے تشویش ناک تھی، جہاں مقامی حکام کے مطابق گولہ باری اور ڈرون حملوں کی وجہ سے شدید انسانی بحران جنم لے چکا تھا۔