روس میں کرپٹو کرنسی کے لیے جامع قانون منظور، صدر پوتن نے دستخط کر دیے

روس کے صدر ولادیمیر پوتن نے ایک نئے جامع قانون پر دستخط کر دیے ہیں جس کے تحت ملک میں پہلی مرتبہ کرپٹو کرنسیوں اور ڈیجیٹل مالیاتی حقوق کے استعمال، خرید و فروخت اور نظم و ضبط کے لیے باقاعدہ قانونی فریم ورک متعارف کرا دیا گیا ہے۔ اس قانون کے ذریعے کرپٹو ایکسچینجز، ڈیجیٹل ڈپازٹریز اور دیگر مالیاتی اداروں کی سرگرمیوں کو قانونی دائرے میں لایا گیا ہے، جبکہ عام سرمایاکاروں کی مالی تحفظ اور مارکیٹ کی شفافیت کے لیے بھی واضح قوانین اور حدود مقرر کر دی گئی ہیں۔

نئے فریم ورک کے تحت روس میں صرف وہی کمپنیاں یا ایکسچینجز کام کر سکیں گی جو حکومت کے خصوصی سرکاری رجسٹر میں رجسٹرڈ ہوں گی۔ البتہ، فی الوقت کام کرنے والے موجودہ آپریٹرز کو یکم جولائی 2027 تک اپنی رجسٹریشن کا عمل مکمل کرنے کی مہلت فراہم کی گئی ہے۔ اس قانون کے تحت ملک کے اندر اشیا یا خدمات کے بدلے براہِ راست کرپٹو کرنسی کے ذریعے ادائیگی کرنے پر پابندی برقرار رہے گی اور کرپٹو ادائیگیاں مشتہر کرنے پر بھی مکمل ممانعت ہو گی۔ البتہ، غیر ملکی تجارتی معاہدوں (بین الاقوامی تجارت)، مائننگ کے ذریعے حاصل اثاثوں اور مخصوص مالیاتی لین دین میں کرپٹو کے استعمال کی استثنیٰ حاصل ہو گی۔

مالیاتی نظام کو محفوظ بنانے کے لیے بینکوں کو یہ اختیارات دیے گئے ہیں کہ کسی بھی مشکوک کرپٹو لین دین کی صورت میں وہ رقم کی منتقلی روک سکیں گے۔ قوانین کے مطابق عام سرمایہ کار سالانہ 3 لاکھ روبل تک کی اعلیٰ درجے کی معروف کرپٹو کرنسیاں خرید سکیں گے، جبکہ اس سے زائد رقم کی سرمایہ کاری صرف تصدیق شدہ (کوالیفائیڈ) سرمایہ کار ہی کر سکیں گے۔ اس جامع قانون کی زیادہ تر شقیں یکم ستمبر 2026 سے نافذ العمل ہوں گی، جبکہ بعض تکنیکی اور انتظامی ضوابط کو 2027 تک مرحلہ وار نافذ کیا جائے گا۔