اردگان کا شام میں انتشار پھیلانے کی کوشش پر اسرائیل کو سخت انتباہ

ترکی کے صدر رجب طیب اردگان نے انقرہ میں ایک اہم خطاب کے دوران شام میں دوبارہ افراتفری اور انتشار پھیلانے کی کوششوں پر اسرائیل کو شدید خبردار کیا ہے۔

ترک خبر رساں ادارے (انادولو) کے مطابق صدر اردگان نے اپنے خطاب میں کہا کہ اگرچہ شام سے مثبت پیشرفت کی خبریں موصول ہو رہی ہیں، لیکن اسرائیل وہاں حالات کو خراب کرنے اور بدامنی پھیلانے کی مسلسل کوششیں کر رہا ہے۔ انہوں نے گہری تشویش کا اظہار کرتے ہوئے کہا کہ خطہ اس وقت ایک شدید بحرانی طوفان کی زد میں ہے جس کی شدت میں روز بروز اضافہ ہو رہا ہے۔

ترک صدر نے عالمی و علاقائی سیکیورٹی صورتحال کا احاطہ کرتے ہوئے نشاندہی کی کہ ترکی کی شمالی سرحد کے قریب روس یوکرین جنگ اپنے پانچویں سال میں داخل ہونے کو ہے، معاہدوں کے باوجود فلسطین پر اسرائیلی مظالم جاری ہیں، جبکہ ایران میں جاری کشیدگی کے ساتھ ساتھ یمن کا نیا تنازع بھی سامنے آ چکا ہے۔ اردگان نے سعودی عرب پر حوثیوں کے حالیہ حملوں کا ذکر کرتے ہوئے سعودی عرب کو ترکی کا اہم دوست ملک قرار دیا اور کہا کہ ان حملوں نے علاقائی کشیدگی کو تشویشناک حد تک بڑھا دیا ہے۔