راولپنڈی میں ای چالان سسٹم فعال، ٹریفک قوانین کی خلاف ورزی پر خودکار جرمانے جاری

راولپنڈی میں ٹریفک قوانین کی خلاف ورزیوں کے خلاف اہم پیش رفت ہوئی ہے اور شہر میں ای چالان سسٹم آج سے باضابطہ طور پر فعال ہوگیا ہے۔ وفاقی دارالحکومت کے جڑواں شہر میں سیف سٹی پروجیکٹ کے تحت نصب کیمروں سے ٹریفک خلاف ورزیوں کی خودکار نگرانی اور چالاننگ شروع کر دی گئی ہے۔

ایکسپریس نیوز کے مطابق سیف سٹی پروجیکٹ کے کیمروں کے ذریعے خلاف ورزی کی تصاویر اور کوڈ کے ساتھ ای چالان گاڑی کے مالک کو ارسال کیا جائے گا، جس کا جرمانہ مقررہ وقت کے اندر جمع کرانا ضروری ہوگا۔ ای چالاننگ سسٹم کو براہِ راست سیف سٹی کمانڈ اینڈ کنٹرول سینٹر سے منسلک کیا گیا ہے۔

جدید نظام کے تحت ٹریفک سگنل کی خلاف ورزی، بغیر ہیلمٹ موٹر سائیکل چلانا، لین وائلیشن، دورانِ ڈرائیونگ موبائل فون کا استعمال اور غیرنمونہ نمبر پلیٹس پر بھی فوری چالان جاری ہوگا۔ خلاف ورزی ریکارڈ ہوتے ہی چالان گھر کے پتے پر بھجوا دیا جائے گا۔

سیف سٹی حکام کے مطابق شہر میں 359 مقامات پر 2000 سے زائد کیمرے نصب ہیں جبکہ داخلی و خارجی راستوں پر 15 خصوصی کیمرے لگائے گئے ہیں۔ یہ نظام نہ صرف ٹریفک مینجمنٹ اور پولیس کی کارکردگی بہتر بنانے میں مدد دے رہا ہے بلکہ عوامی مقامات کی مسلسل مانیٹرنگ کا بھی اہم ذریعہ بن رہا ہے۔ حکام کا کہنا ہے کہ جدید سرویلنس سسٹم جرائم اور واقعات کی بروقت رپورٹنگ میں بھی مؤثر ثابت ہورہا ہے۔