ایران کو اپنے 3 پائلٹس قطر میں قید ہونے کا شبہ، ریڈ کراس سے مدد کی اپیل

ایرانی فوج کی گمشدہ افراد کی تلاش سے متعلق کمیٹی کے سربراہ بریگیڈیئر جنرل محمد باقر زادہ نے دعویٰ کیا ہے کہ 2 مارچ 2026ء کو قطر میں ایک مشن کے دوران متاثر ہونے والے دو ایس یو 24 طیاروں کے 3 ایرانی پائلٹ (جواد صالحی، عبدالمجید دشتیان اور عمران بہروشیان) قطر میں قید ہیں۔ انہوں نے ریڈ کراس (ICRC) کی صدر سے ان کی صورتحال واضح کرانے کی اپیل کی ہے، جبکہ چوتھے پائلٹ ماجد کاظمی کی میت پہلے ہی ایران منتقل کی جا چکی ہے۔

دوسری جانب قطری وزارتِ خارجہ کے ترجمان ماجد الانصاری نے ان دعوؤں کو گمراہ کن قرار دیتے ہوئے سخت تردید کی ہے۔ انہوں نے واضح کیا کہ مارچ میں فضائی حدود کی خلاف ورزی پر بین الاقوامی قوانین اور اپنے دفاع کے تحت کارروائی کی گئی تھی، جس کے بعد ریسکیو آپریشن میں صرف ایک پائلٹ کی لاش ملی تھی جسے تمام تر قانونی تقاضے پورے کر کے ایران کے حوالے کر دیا گیا تھا۔