مکہ میوزیم میں قرآن مجید کے نایاب نسخے کے صفحے کی نمائش

سعودی عرب کے شہر مکہ مکرمہ میں واقع حرا کلچرل ڈسٹرکٹ کے قرآن میوزیم میں تیسری صدی ہجری سے تعلق رکھنے والے قرآن مجید کے ایک نایاب نسخے کے صفحے کی نمائش کی جا رہی ہے۔ سعودی خبر رساں ایجنسی کے مطابق چمڑے پر سرخ روشنائی سے تحریر کردہ اس تاریخی صفحے پر سورۂ مریم کا ایک حصہ درج ہے، جس میں ابتدائی قرآنی کتابت کے طرز کے مطابق اعراب اور نقطے موجود نہیں ہیں۔ کنگ عبدالعزیز لائبریری کے نادر ذخیرے سے حاصل کردہ یہ مخطوطہ زائرین کو ابتدائی اسلامی صدیوں میں قرآن مجید کی کتابت، تدوین اور اس کے ارتقائی سفر کو سمجھنے کا منفرد اور علمی موقع فراہم کر رہا ہے۔