بادشاہ کی دوسری بیوی کی مبہم پوسٹ نے مداحوں کو الجھن میں مبتلا کر دیا

مشہور بھارتی ریپر بادشاہ اور ان کی دوسری بیوی، پنجابی اداکارہ ایشا رکھی کی شادی ایک بار پھر خبروں کی زینت بن گئی ہے۔ ایشا رکھی کی ایک تازہ اور مبہم سوشل میڈیا پوسٹ نے مداحوں کو شدید تشویش اور الجھن میں مبتلا کر دیا ہے، جس سے دونوں کی ازدواجی زندگی میں مسائل کی افواہوں کو تقویت مل رہی ہے۔

عام طور پر اپنی ذاتی زندگی کو میڈیا کی نظروں سے دور رکھنے والی ایشا رکھی نے حال ہی میں انسٹاگرام پر بادشاہ کے ساتھ اپنی شادی اور یادگار لمحات پر مبنی ایک ویڈیو کلیپ شیئر کیا۔ تاہم اس خوبصورت ویڈیو کے ساتھ دیے گئے پیغام نے سب کو حیران کر دیا۔ انہوں نے کیپشن میں لکھا، “ہر طوفان ایک سبق ہوتا ہے، اور ہر دعا ایک امید”، اور اس کے ساتھ ایک ٹوٹے ہوئے دل (💔) کا ایموجی بھی بنایا۔

اس پوسٹ کے سامنے آتے ہی سوشل میڈیا صارفین نے دونوں کے تعلقات پر سوالات اٹھانے شروع کر دیے ہیں۔ رہی سہی کسر اداکارہ جاسمین بھاسن کے کمنٹ “مضبوط رہو” (Be Strong) نے پوری کر دی، جس کے بعد مداحوں کا شک مزید پکا ہو گیا ہے کہ ان کی شادی شدہ زندگی میں کچھ ٹھیک نہیں چل رہا۔

واضح رہے کہ بادشاہ اور ایشا رکھی کی سادگی سے کی گئی شادی کی خبریں مارچ 2026 میں اس وقت سامنے آئی تھیں جب ایشا کی والدہ نے تصاویر شیئر کی تھیں، جس کی بعد میں ایشا رکھی نے خود بھی تصدیق کی تھی۔